ЭЭЖ

Америкийн яруу найрагч Чарльз Буковски бол баян нийгмийн ядуу хэсгийнхний дуу хоолой болсон найрагч. Тэрээр Германд төрсөн Америкийн уран бүтээлч юм. Буковскийн уран бүтээлийн гол сэдэв бол түүний бүхий л амьдралаа өнгөрүүлсэн Нью-Йорк хот нь. Гаднаас нь харахад хачин гял цал энэ хотын хамгийн гүнд өл хоосоноо шүлгээр дарж явдаг түүний мэт хүмүүс амьдардаг юм шүү, амьд бий шүү гэдгийг Буковский энгийн агаад задгай бичлэгтэй , бодит амьдралын харанхуй мухраас дуулсан бор бааз агаад эрс тэс шүлгүүдээрээ тунхагласаар ирсэн юм.

Дашрамд дурдахад би вээр түүний зохиолоор найруулагч Бент Хамерийн бүтээсэн “Фактотум” буюу “Хар ажлын хүн” киног нэн их таашаадаг хүн. Кинонд уг нь зохиолч болох их хүсэлтэй ч ахуй амжиргаандаа нухлуулсан нэг эрийн тухай гардаг. Ядуу дээрээ гажуу, түүнээсээ болоод нийгэмтэйгээ авцалдаж өгдөггүй нэг тийм эр. Гэвч тэр хар ажлын дөргүй хэмээн гологдож хаалганаас хаалганы хооронд хөөгдөж туугдан амь зуусаар байх хугацаандаа зохиолоо уйгагүй бичиж хэвлэлийн газрууд руу илгээсээр байдаг. Киноны энэ өгүүлэмж бол яг үнэндээ Буковскийн өөрийнх нь л амьдрал юм билээ.

Ээж

энд би

газар дор

эрүү амаа ангайчихсан

ээжээ ч гэж дуудаж чадахгүй

хэвтэж байна.

хажуугаар гүйх нохой хүртэл

булшны маань чулуу руу сарьчихаад

харайлгаж одох юм.

нар үзэхгүй болохоос биш

надад дутах юм алгаа.

хувцас маань үжирч муудаад

хэргээ алдаж байна.

өчигдөр

зүүн гар маань тасарч унаад

мөргүй шахам үлдсэн би

хөггүй ятга шиг

хөгийн юм болчихоод байна.

тамхи амандаа зуусан

хэвтэрийн архичин хүртэл

тавын таван галын машиныг

гучин гурван эртэй нь бажгадуулж дөнгөнө дөө.

харин надад

чадах юм гэж

даанч алгаа.

нэмж хэлэхэд

хажуугийн булшинд

Хектор Ричмонд бий.

жаран хөлтийн дүрстэй зөөлөн чихэр,

Моцарт хоёроос өөр юм боддоггүй энэ хүн

муу хүүд нь хань болноо гэдэг

юу л бол доо.

Орчуулсан Б.Баясгалан